Nyttårskonsert med Ulf og HDU

Nyttårskonserten er eit av høgdepunkta i sesongen for begge korpsa. I heile 24 år har vi utvikla eit godt samarbeid og gjennomført solide arrangement. Kvart år med mål om å gjere konserten betre enn året før, samt levere ei unik musikkoppleving til vårt trufaste og engasjerte publikum.

Vi treng ikkje gå langt etter gull, og vi er stolte over å kunne presentere årets solist. Noregs ultimate entertainer og artist er frå Tomrefjorden, og det er ingen ringare enn Knut Marius Djupvik som tek turen til Ulsteinvik og Nyttårskonserten i januar. Med sitt vinnande vesen, imponerande vokalprestasjonar og formidlingsevne vil Knut Marius imponere oss alle.

Djupvik har alltid vore interessert i musikk, og har ei mastergrad i rytmisk musikk ved Universitetet i Agder. Karrieren starta for fullt etter sigeren i songtevlinga «The Voice» i 2013, og Knut Marius har sidan då levd av musikken. Han er kjent for å gi ALT på scena og beherskar alle sjangrar fra rå rockelåtar til det vare og nære – alt levert med høg gåsehudfaktor. Storband, opera og jazz. Knut Marius leverer.

No ser vi fram til å høyre Knut Marius løfte taket på Sjøborg, saman med Nyttårskonserten sitt storkorps, leia av dirigentane Bjørn Falk Skodjevåg og Nick Ost. Saman med konferansier Kari Brandal, er vi sikre på at dette blir tidenes Nyttårskonsert. Det er berre å gle seg!