For 115 år sidan vart setra som låg her overflødd etter eit steinras. Under overflata ser du grunnmurane til husa, tre langs setervegen og ei intakt bru som framleis står på botnen av vatnet. No kan du ta eit djupdykk i denne spesielle historia.
I fantastiske Norangsdalen, eit par timars køyring frå Ålesund eller Geiranger, kan du stoppe ved Lygnstøylvatnet og få ei oppleving du seint vil gløyma. På 1800-talet var dalen og området som vatnet ligg i leikegrind for kongelege, keisarar, kulturelite og anna fintfolk. Plutseleg ein dag gjekk det eit steinras frå fjellet Keipen som demde opp elva og overflødde heile setra.
Men heilt borte er ho ikkje. Når vatnet er roleg, kan du sjå restane av hustuftene under vassflata frå land. Og med kajakk og undervasskikkert får du eit unikt innblikk i ei over hundre år gamal historie.
Helge Kvam Karbø frå 62°NORD er guide og fortel om vatnet si unike historie.
– Før var det ei elv, ein veg og nokre seterstølar, men så kom det eit steinras fra fjellet Keipen som demde opp elva og overflødde husa og vegen, fortel Karbø.
Retter ein blikket mot botnen av vatnet har tida stått stille og bevart spor etter livet som blei levd her.
– Du kan sjå murar frå gamle hus og vegen med bruer som framleis er intakte under vatn, seier guiden.
Øyvind Yttervik og kjærasten Irmelin Melheim har teke turen til Norangsdalen for å oppleve vatnet. Med kajakk og undervasskikkert får dei sjå den gamle stølen på nært hald samtidig som guiden deler historia til staden.
Øyvind Yttervik
Frå Sæbø på andre sida av Hjørundfjorden, går det ferje til Leknes. Følg vegen forbi Urke og Øye til du kjem til Lygnstøylvatnet på fylkesveg 655. Her kan du fortsette til Hellesylt og vidare med ferje til Geiranger, eller du kan dra mot Stranda eller Stryn via Hornindal.
Berre 10 minutt med bil frå Norangsdalen ligg Hjørundfjorden. Ein av dei flottaste fjordane i landet. Her finn du blant anna ærverdige Hotel Union Øye, med ei rik historie og imponerande utsjåande. Dette området er omringa av spektakulære fjell, som blant anna 1564 meter høge Slogen. Hit kom ein gong engelske adelsmenn med eventyrlyst og klatrelyst. Fekk ikkje du også lyst?
