Sjå verdsarven i haustfargar

Skageflå og Knivsflå

I Geiranger stend opplevingar i kø. Og i haust slepp du å stå i kø for å oppleve dei. Du kan mellom anna gli lydlaust forbi bratte fjell med kajakken din. Her kastar fossane "Dei Sju Søstrene" seg ned i fjorden. På eit platå ved sida av fossane finn du Knivsflå, ein kjend fjellgard med ei storslagen utsikt. På den andre sida av fjorden finn du garden Skageflå.

Turen opp er bratt og snor seg opp mura trappar med trygge rekkverk. Herfrå kan du gå tilbake til Geiranger sentrum via Homlong, der du får ei svimlande utsikt for kvart steg du tek.

Fosseråsa - Noregs første nasjonale turiststi

Det spektakulære fossevandringsprosjektet i Geiranger er vorte ein stor attraksjon, og sommaren 2019 vart ein utvida versjon - Fosseråsa - godkjend som den første nasjonale turiststien i landet.

Fosseråsa gir storslått utsikt mot bratte fjell, mektige fossefall og ein av dei finaste fjordane på Vestlandet, sa klima- og miljøminister Ola Elvestuen, då turiststien vart opna.

Norsk Fjordsenter

Dersom du er på toppen av fossevandringa eller i nærleiken av Hotel Union, bør du ta turen innom Norsk Fjordsenter. Her kan du læra meir om UNESCO si verdsarv og skaffe deg litt lokalkunnskap krydra med ein mektig biletpresentasjon av området.

Noregs Oscar-kandidat "Bølgen" selde åleine 833.000 kinobillettar. Den norske storfilmen fekk omfattande merksemd både nasjonalt og internasjonalt. Ei av utstillingane i Fjordsenteret handlar om historia om naturkatastrofen som held fram med å true den dag i dag. Elles tilbyr senteret gode smårettar i eigen kafé og butikk med fokus på norske produkt. Her finn du også eit stort uteområde der både små og store kan kose seg.

Geiranger Skywalk, 1.476 meter over havet

Tek du turen opp til Dalsnibba får du Europas høgaste fjordutsikt frå bilveg. Utsiktspunktet har fått namnet Geiranger Skywalk. Det er ei magisk oppleving å gå ut på platået og sjå gjennom ristene og rekkverket av glas. Ein kan kjenna vinden som kjem opp gjennom ristene og få opplevinga av at ein nesten går på skyer. Her får ein oppleva den spektakulære utsikta over Geiranger, fjorden og fjella rundt på ein heilt ny måte. Dersom snøen skulle trekkja nedover fjellet i løpet av hausten, kan ein bli nøydd til å stenga utsiktspunktet og vegen videre mot Grotli.

Selfiefavoritter

Når du fyrst har tatt turen til Geiranger, bør du setja av litt tid til å nyta utsikta frå nokre av landets mest kjende utsiktspunkt.

Ørnevegen er namnet på dei 11 hårnålsvingane som går opp den bratte og frodige lia frå Geiranger mot Eidsdal. Øvst i Ørnevegen, 620 meter over havet, ligg utsiktspunktet Ørnesvingen som òg har sitt eige fossefall. Her kan du nyta utsikta mot Geiranger og utover Geirangerfjorden med sine stupbratte fjellsider.

På toppen av Flydalsjuvet kan du nyta ei ikonisk utsikt utover verdsarvfjorden. Her finn du installasjonen "Fjordsetet", innvigd av Dronning Sonja. Flydalsjuvet ligg om lag fire kilometer frå Geiranger sentrum i retning Grotli, men berre ein kort spasertur frå utsiktspunktet sin eigen parkeringsplass.

Lokal mat, spa og avslapping på Hotel Union

Hotel Union blir i dag drive av ekteparet Monja og Sindre Mjelva. Sindres oldeforeldre kjøpte hotellet i 1899, og Hotel Union Geiranger har i dag kanskje ein av landets beste spa-avdelingar. Her kan ein nyta avslappande spabehandlingar, rolege stundar i boblebadet eller ta seg ein symjetur i eit av bassenga med ei magisk utsikt. Det ærverdige hotellet har og eit eige veteranbilmuseum, og er eit godt utgangspunkt for haustturar i dei mektige fjella som omkransar Geiranger.