Bygningar og stad med kulturhistorisk og antikvarisk verdi. Årbakka Handelsstad er ein klassisk, vestlandsk handelsstad, med handelsbu, smie og sjøbu. Den blei etablert i 1898. Smie og sjøbu måtte byggjast nye etter brann i 1929. Her har vore dampskipsekspedisjon og postkontor. I 1960 blei handelsverksemda flytta opp til hovudvegen. Bygningane står innvendig og utvendig omlag slik dei var på 30-talet. I sjøbua er det plata mellom veggstolpane for å gjere lokalet eigna til kunstutstillingar. Bygningar: sjøbu/galleri, kystlaget si utstilling i smio, og handelslokala i første høgda i hovudhuset. Det som skil denne handelsstaden frå andre liknande tiltak, er at den er næraste nabo til eit gravfelt frå eldre jarnalder med fleire bautasteinar. Om sommaren har Tysnes Kystlag permanent utstilling i smio, i sjøhuset er det kunstutstillingar. På vegen ned mot området står ei informasjonstavle.
God parkering (òg for bussar) 30 meter frå anlegget, skilting ved hovudvegen.
I den gamle butikken kan du kjøpa kaffi og vaflar, gammaldagse drops og sukkerkandis, is og handverksprodukt. Kjem du med båt, kan du ein leggje til langs gjestebryggja med eigen båt!
Følg Årbakka Handelsstad på Facebook og Instagram for oppdateringar og arrangement.
Årbakka Handelsstad har sommarope laurdagar og søndagar mellom 12-16 i tida frå 18. mai til 11. august. Utvida opningstider under Tysnesfest.
Sesongopning 2024: 18. mai kl 12.
