Når du stig inn i ei av dei små, lafta stovene, stig du inn i livet til Sunnfjordingen på 1800-talet. Langs stiane mellom torvlagde tak, hesjer og ein liten kvernbekk, kan du ane kvardagen på den tida våre tipp-tipp-oldeforeldre levde.
Kulturarv og daglegliv
Friluftsmuseet syner fram kulturarv og daglegliv frå dei indre Sunnfjordbygdene. Med over 30 antikvariske bygg, får du oppleve eit tradisjonelt tun, ein husmannsplass og ein støl. Ved vatnet står det naust, og her kan du om sommaren ta deg ein dukkert og helse på museumsgeitene.
Kulturhistorisk utstilling
Innandørs finn du skiftande kulturhistoriske utstillingar, museumsbutikk og du kan få kjøpt deg is. I skogen rundt museet finn du informative turløyper. I sommarhalvåret kan du få ei skreddarsydd og familievenleg omvising på norsk og engelsk.
Kor ligg Sunnfjord Museum?
Sunnfjord Museum ligg i Movika langs E39 mellom Førde og Jølster. Museet har gratis parkering for besøkande
Tilgjenge for rørslehemma
Friluftsmuseet har grusveg, med varierande tilkomst. Det er avgrensa tilgang for rørslehemma besøkande i dei antikvariske husa, men museet kan legge til rette for tilkomst i Østenstadstova og skulen.
Ta gjerne kontakt på førehand.
Museumsbutikk og kiosk
I museumsbutikken finn du eit utval av bøker, gåveartiklar, tradisjonelle leiker, og handverksprodukt laga i Noreg. Her er servering av kaffi, is, og kioskvarer.
Butikken held ope i museet si opningstid.
Besøk utanom opningstid
For besøk utanom opningstid, ta kontakt. Eigne prisar er gjeldane for besøk utanom opningstid. På museet sine sider finn du full oversikt over billettprisar
