Fjord, flyt, full fart - Stavanger

Stad å bu

Hotel Victoria

Ein gamal klassikar vart ny etter «total makeover», som me sier på nynorsk. Ekstra stas er det at hotelldirektør Monika Sandvold og co. har henta fram mykje av det opprinnelege interiøret, gamle møblar og speil, og historiske fargar. Internasjonal atmosfære har og funne vegen, med parisisk inspirert bar og fortauskafé «Salon du Nord» og erkebritisk, herleg tradisjon med Afternoon Tea i bankettsalen på laurdagar. Brandsberg Dahl arkitektar og interiørdesignar Anemone Wille Våge har gjort ein kjempejobb!

Stad å ta eit glas

Salon du Nord

Hotel Victoria har opna litt av Paris med 1900-tallsdekor i sin Salon du Nord. Denne lekre staden har eg merka kan verta ein ny favoritt hjå mange. Ta ein lunsj eller eit glas på dagtid, eller prøv ein kul og kunstnarleg cocktail litt seinare på kvelden.

Stad å innta lunsj

Sirkus Renaa Sølvberget

Den uformelle restauranten til Renaa, som ligg i Stavanger kulturhus Sølvberget, der kino og bibliotek og er, er ein lett og ledig stad med gode smårettar og herleg pizza. Sjølv om den og fungerar som ein utmerka kaffi og isbar, tar dei ikkje lett på pizzaen. Ekte italiensk med tynn botn, slik den skal vera.

Stader verd eit besøk

Private Cruise

Har du lyst på ein tur på fjorden heilt åleine eller i ei lita gruppe, kan du leiga din eigen yacht hjå Private Cruise til 7 eller 12 personar med båtane The Barolo og The Marquis.

Damp

Byen si fyrste flytande sauna har eg sjølvsagt testa, og den kan brukast åleine eller av heile reisefylgjet. Kombinasjonen av kalde bad og varm, dampande badstue har vorte veldig populært her i byen, så pass på at du planlegg og bookar på førehand – så er du sikker på at du ikkje reiser heim med tørt hår.