Spektakulær overnatting i FjordKysten og Sunnfjord

Kva om sjølve staden du bur på, er den største opplevinga? I FjordKysten og Sunnfjord finn du overnattingar som smeltar saman natur, arkitektur og ro – perfekt for deg som søker noko ekte, annleis og inspirerande. Her ventar ei natt du seint vil gløyme.

Kom heilt tett på naturen i ei Birdbox – ei lita verd for berre dykk to

Gøymt bort frå verda, langt frå kvardagens mas, ligg ei Birdbox – ei luksuriøs og minimalistisk hytte, plassert midt i naturens ro. Her kan de finne dykkar eige, romantiske fristed – tett på vill norsk natur, men med all komforten de treng.

Designa for å gli inn i landskapet, og for å tole alt det norske vêrgudane måtte finne på, gjev denne vesle hytta deg ei heilt spesiell oppleving. Med store panoramavindauge får du naturen rett inn – utan å bli sett. Kjenn på magien når snøen dalar stille ned utanfor, når stormen ruskar i tretoppane, eller når kveldssola badar landskapet i gyllent lys.

Inne ventar ei stor, mjuk seng, lune tekstilar og ei varm, moderne atmosfære – perfekt for å krølle seg saman med ein kopp te og ei god bok. Og når du vil ut av reiret? Då ligg naturen rett utanfor døra. Gå ein tur i fjellet, ta eit friskt bad, eller berre sitt i stilla og pust.

Dette er ikkje berre ei overnatting. Det er ei kjensle. Ei oppleving. Ei påminning om det enkle, det ekte – og det vakre.

Senk kvilepulsen – og finn roen på Flatheim

Midt i det ville og vakre landskapet langs Nasjonal turistveg Gaularfjellet ligg Flatheim – eit sjarmerande, lite gardshotell der naturen er tett på og kvardagen kjennest langt unna. Her ventar stillheit, nærleik til elva og fjella, og ei atmosfære som gjev rom for pust, ro og påfyll.

Flatheim byr på overnatting med sjel – i historiske tømmerhus der kvart rom har sitt eige uttrykk, innreia med varme, omtanke og respekt for historia. Rundt tunet finn du ein frodig hage med blomar og nyttevekstar, og like ved renn det glitrande Gaularvassdraget – ein stille følgesvenn du både kan bade i, fiske i, og følgje på vakre vandringar langs Fossestien. Her byr naturen på sitt beste, året rundt.

Om du vil starte dagen med ein topptur rett frå tunet, eller avslutte den med eit forfriskande elvebad og ein varm badestamp under open himmel – så ventar Flatheim med opne armar.

Glamping ved elva – det gode, enkle liv

For deg som drøymer om endå tettare kontakt med naturen, tilbyr Flatheim glamping i luksuriøse telt ved elvekanten. Her søv du til lyden av sildrande vatn, vaknar til fuglesong, og lever sakte – heilt i pakt med naturen.

Elvasuite på Jølstraholmen – luksus ved elvesus

Tett på den ville og vakre Jølstra, gøymd mellom tre og elvestryk, ligg dei unike Elvasuitene – ein draum for deg som lengtar etter ro, romantikk og ei oppleving heilt utanom det vanlege. Her kan du senke skuldrane, lytte til elvesusen og nyte naturen frå første rad – utan å gi avkall på komfort.

Kvar suite er eit lite paradis, utstyrt med stor, mjuk seng, hengekøye og gode stolar der du kan la tida stå stille – med ei bok, ein god samtale, eller eit glas kald sider frå kjøleskapet. Suitene ligg skjermt frå kvarandre og frå resten av campingområdet, slik at du verkeleg får fred og ro.

Elvasuite 1.0

Her ventar ei spektakulær regndusj – kalla Jølstrafossen – som fell frå 270 cm takhøgd. Utsikta følgjer deg heilt inn i badet, og ute ventar ditt eige vedfyrte badekar, med same magiske utsyn. Ein draum både for kropp og sjel.

Elvasuite 2.0

Ei vidareutvikling av luksusopplevinga, med eige spa-bygg og eit romsleg badekar der du kan nyte varmen og utsikta på same tid. Her får du den ultimate spa-følelsen – i eitt med naturen.

Er du eventyrlysten? Ta eit forfriskande bad i det krystallklare naturbassenget ved elva, før du varmar deg opp igjen i den innbydande badstova. Dette er ei oppleving som pirrar sansane – og senkar pulsen.